لماذا الحضن ...؟؟؟؟؟

حد سأل نفسه ايه هو الحضن ...امت آخر مرة اتحضن ....و بيحب يتحضن من مين ؟؟؟

و أمتى بتحس انك محتاج تترمى فى حضن؟؟

الحضن داه ..هو المكان اللى بتحس انك مالك الدنيا....المكان اللى بتروحله لما الدنيا بتكون مغلباك مضيقاك

حزين و عندل هموم ....لأ داه كمان وقت فرحك

الحضن فى حد ذاته مجال طارد قادر على انه يمحو جميع الشحنات السالبة من خوف وضيق و ألم و قلق و يأس و بكاء

جواك ...عشان كده ساعة ما بتتحضن بتحس بالراحة و الامان و الهدوء

انا بحس ان الحضن داه علاج ....من امراض كتير

و بالتالى لازم اللى يديك الحضن داه يكون أستاذ و رئيس قسم و دكتوراة فى الحنية

لأن الحضن داه ليه أوقات زى الدوا بالضبط ....بيبقى فعال قوى لو جه فى وقته التمام من

الشخص اللى بتبقى محتاجه وقتها و ببتفكر فيه

حد عارف انه مستنيك عشان يلملمك و يحتويك ...تسمع دقات قلبه ...تزيد سكنتك و انشراح صدرك ...

أزاى بقى ..

أزاى بقى نكمل سوا ....حكيتنا مش متصدقة

أزاى بقى يكمل هوى محتار ما بين بعد ولقا

هنسى وفى النسيان وفا ...ما هو أولى بينا نفترق

النار يدوب توهب دفا ...واللى لمسها يتحرق

أهو جيه يا ولاد هيصوا يا ولاد .....رمضان كريم

كل سنة وأنتم طيبيين و بألف صحة وسلامة ....و رمضان كريم

السنة دى مش عارفة كان نفسى كده حد يهل على بفانوس و يقوللى كل سنة وأنا طيبة

امبارح قلت لوالدى ... هو أنت مش هتجبلى فانوس ...الرد هو الاخت مش كبرت على الحاجات دى

فحطيته هنا ..يعنى عشان مخليش فى نفسى حاجة أبدا""""" و هغنى كمان

حالو يا حالو رمضان كريم يا حالو

الصايمين يا حالو...بعد ما فطروا حلوا

حلو بالهنا عقبال كل سنة

we tag we tag wetaaaaaaaag

dodo el sara7 mzabtany fe mato3 el tag dah ,,,, el moham ...negawe ba2ah !!!ya basm el ellah el ra7man el ra7emm" 3al ra2e abde el ftah el osaree"

هل انت عقلانى اكثر ام عاطفى؟

بصراحة كده هو مين المتحكم فى القلب مش الدماغ ...فخلى الدماغ صاحى ...أنا عقلانية صف شخصيتك فى خمس كلمات؟

مش عارفة بجد بس ...تعالوا زرونى واتبرع ولو بصفةباى باى ...

اذا كان لكل انسان شبيه من الحيوانات,أى حيوان يشبهك؟

هو لازم حيوان ..بس كان نفسى ابقى مهرة وجموحها وسرعتها ما هو لونك المفضل؟

بحب الابيض قوى ...لان بنيتدى حياتنا و احنا لابسين اللون داه ولما بنخرج برضه بنبقى بنفس اللون

هل أنت أجتماعى اكثر ام منعزل؟

اجتماعية

ماذا يشكل أصدقائك بالنسبه لك؟

...كل حاجة ..بس أنا أنا أصحابى عددهم قليل قوى ...لأنى مش باخد على الناس بسهولة شوية بالذات مع الناس اللى بتعرف عليهم جديد

هل أنت مرتبط بعائلتك؟

اة الحمد لله وخصوصا" كانت والدتى الله يرحمها هل أنت عصبى أكثر أم هادئ؟

أنا زى الهوا ساعات ببقى مزعببة زى الهوا فى أمشير وساعات ببقى زى نسمة الصبح بدرى لما تداب الخد

هل تفضل فصل الشتاء أم الصيف؟

الشتاء و خصوصا" شهر يناير عز الشتا بحب المطر قوى و بحب صوته متى أخر مره بكيت فيها؟

دا أنا حنفية ..بس ما بحبش أبين دمعتى أصاد حد

الضاحايا ....كل اللى يحب يعمل التاج داه يتفضل .....باب الضحايا مفتوح

نشوانة بسحر جلال الكون .. عشقانة جمال الصوت و اللون

هيمانة ف حلم جميل حيكون .. عنوان الأيام الجايّة

وداعا" الطبقة الوسطى........!!!!

أنا مش هعد الكوارث ...كارثة قطارين شبين القناطر على القطارين اللى قبلهم ،،،على العبارة ..ف مركز الثقافى ببنى سويف...و هلما جره ...والله أنا مش غاوية غم وكآبة ...بس فى كارثة تانيه هو انقراض الطبقة الوسطى

اللى خلانى افكر فى الموضوع داه هو موضوع بطاقة التموين ...

و العوائق اللى عملها الحكومة المحترمة على كسين سكر زجاجتين زيت وشوية شاى

قال ايه ..اللى طلع على المعاش مالوش ..واللى اتخرج وعدى على تخرجه 4 سنوات مالوش حتى ولو ما كنشى بيشتغل

ايه داه الناس هتلاحقها منين ولا منين .....هما بيقتلوا الناس بشويش

سألت وعرفت ان اللى عمل الطبقة الوسطى كان عبد الناصر وزادت واتسعت فى فترة لما عبد الناصر ملك الفلاحين الاراضى الزراعية وبالتالى ناس من الطبقة الفقيرة بدأت تملك أراضى وبالتالى ارتفعت وناس من الاغنياء فقدوا الاراضى وبالتالى نزلوا للطبقة الوسطى

و بالتالى هنا زادت مساحة الطبقة الوسطى فى المجتمع ....

الطبقة الوسطى أغلبها من الناس المتعلمين و الموظفين لكن الطبقة دى دائما" عندها معاناة ؛خوف من بكره، عدم شعور بالاستقرار ،دائما"

فى حالة ترقب ...الطبقة الوسطى دائما" أفرادها فى حالة تطلع مستمر

لكن لو لاحظنا هنلاقى ان الطبقة الوسطى ..معاناتها وضحت فى الثمانينات وزادت فى التسعنيات ...لما بدأ باب الهجرة للدول العربية يقل

بدأ تخلى الدولة عن كتير من الحاجات اللى لازم تقوم بيها زى تعيين الخريجين وبالتالى زيادة البطالة

ارتفاع الاسعار و الغلاء ...المجنون اللى بيحصل فى المجتمع

وجود فوارق فى دخول الافراد ....و بالتالى بدأت الطبقة الوسطة ...دخول دوامة ممتدة

طبعا" الدوامة دى مش هتخرج منها ...خلينا نقول عملية الهرس للطبقة دى

السؤال هنا هل خلاص مابقاش فى طبقة وسطى ؟؟؟و لو اه هيبقى تقسيمة المجتمع طبقة فقراء وطبقة أغنياء

أنا عن نفسى مش عافة انا منتمية لأى طبقة ..بس اللى متأكدة منه انى مش تبع الاغنياء خالص....

دا تاج جميل و تاج معقول ما أقدرش أقول لدودو حاجة عنه ... بس أنا مش شاطرة قوى فى الموضوع داه بس هحاول ...ياله

هل انت مستكيف من مدونتك شكلا وموضوعا ؟

مش قوى ساعات بكرهها وساعات بحبها ...فى العادىنصف مستكيفة ..يعنى راضية ...شغالة هل تعلم أسرتك الصغيرة بأمر مدونتك؟

...لا

أهل بتتكسف تقول لاصدقائك عن مدونتك؟

مش موضوع كسوف بس مرة قولت لوحدة صاحبتى ...قالتلى بالفوم المليان هو الابلتين اللى فى دماغك ضرب انتى اتهبلتى ...فقررت انى ما اتعبشى نفسى ..عارفة الاعلان بتاع ريرى هو انتى لسة هتشترى و و تغسبى وتغسلى وتقطعلى و تقطعى وتسوى

أهو أنا كده اشتريت دماغى وما بقيت ما بقولشى لحد

هل شقلبت المدونات حياتك للاحسن ،أديني مثال ؟

اساسا" هى متشقلبة خلقة ....بس هل تكتفى بفتح صفحات من يعقبون بردود فى مدونتك ؟ ولا مقضيها وسارح سواح في مدونات خلق الله؟

من نحية أنا بسرح فابسرح كتير ...ببوص هنا وهناك وحشرية وتنحة لمؤاخذة

ماذايعنى لك عداد المتطفلين.. هل تهتم بوضعه فى مدونتك؟

والله أنا مش حاطة ...بس أوعدك انى احطه

هل حاولت تخيل شكل اصدقائك المدونين؟

حاولت لكن انا دماغى فيها حاجة مش مظبوطة عاوزحد يجى يظبط الاريال عشان الصورة تبقى حلوة ...بس الاكيد انهم ناس 100 /100

على راى الاخت دانا

هل تشعر ان مجتمع التدوين مجتمع منفصل عن العالم المحيط بك ام متفاعل مع احداثه؟

متفاعل جدا" ...بجد بس يا سلام لو التفاعل داه معاه عامل مساعد ...حرارة ...ايه هيطلع فرقعة ...وتقلاقى الجو كده لعلع و نعنش

بحد متفاعل جدا" و بحس أن ناسه ...ناس متفتحه جدا" واعيه للى بيدور حواليه ..

عاوزه تعمل حاجة ...بس ما باليد حيله ...بيحبوا بلدهم و بيخافوا عليها

هل ترى فائدة حقيقة للتدوين؟

هتحب طعم شايك أكتر...

هل يزعجك وجود نقد بمدونتك؟ ام تشعر انه ظاهرة صحية؟

يا أهلا بالناس ..النقد الحلو و الوحش ...أنا أكس أكس لارج ...والدخول بالمشاريب ساقع وسخن كمان

واحد ساقع للهانم وشاى للبيه

بس يا بخت من زار و خفف هاه

هل تخاف من بعض المدونات السياسية وتتحاشاها؟ هل صدمك اعتقال بعض المدونين؟

انا مش هقول أنى بفهم فى السياسة قوى ...بس لازم نتابعها ...اصل من غير سياسة أنت انسان جاهل

و بعدين فضينا من السيرة دى بقى ...يجعل كلامنا خفيف على اللى بالى بالك

هل فكرت فى مصير مدونتك فى حال وفاتك؟

هتيتم من بعدى ...لها الله ...زى ما احنا كلنا لنا الله

ماشى يا دعاء بتفوللى فى وشى ...لن أنسى لكى هذا الموأف

آخر سؤال: تحب تسمع ايه؟

هو احنا على الناصية ....احب اسمع على ورق الفل دلعنى ...الاغنية دى بحبها قوى لواحدة ست جامدة مووت صوتها حلو بس مش فاكرة اسمها ..و سلامى لبابا و انكل و اخواتى ...

اكتب اسماء خمسة مدونين ليقوموا بهذا الاستقصاء بعدك

سليما -

مهندس مصرى -

karakib-

مزيكا حزينى شوية -

سيبها على الله -